Алғашқы қоңырау соғылып, балалардың мектепке барар сәті де алыс емес. Жыл сайын бағасы шарықтай түсетін оқу құралдары мен мектеп формасын сатып алуды баршаның қалтасы бірдей көтере бермейтіндігі рас. Осыған орай әлеуметтік жағынан қорғалмаған отбасы балаларына қолдау көрсету мақсатында дәстүрге айналған «Мектепке жол» республикалық акциясы облыста биыл да жүйелі жалғасуда.
Білім бөлімі Оқу-ағарту министрлігінің 2023 жылдың 1 тамыз – 30 қыркүйек аралығында «Жақсылық жаса» ұранымен «Мектепке жол акциясын» өткізу туралы тапсырмасы Қаратал ауданында да жүйелі орындалуда.
Акцияның мақсаты – әлеуметтік жағдайы төмен, аз қамтылған және көпбалалы отбасыларынан шыққан, жетім балалар мен ата-анасының қамқорлығынсыз қалған балалардың мектепке баруына мүмкіншілік жасап, көмек көрсету. Жалпы аудан бойынша көмекке мұқтаж 168 баланың тізімі белгіленді. Қазіргі уақытта 159 балаға демеушілер тарапынан көмек көрсетілді. Әлі де жәрмеңкелер ұйымдастырылуда.
Акция аяқталғанға дейін оқушылар керекті құрал-жабдықтармен толық қамтылмақ.
А. НАЗАРҰЛЫ
Қаратал ауданы
